Robbie á eftir að skora miklu fleiri mörk

Robbie Keane náði loks að opna markareikning sinn fyrir Liverpool gegn PSV Eindhoven á miðvikudagskvöldið. Rafael Benítez, framkvæmdastjóri Liverpool, telur að Írinn eigi eftir að skora miklu fleiri mörk fyrir Liverpool.

"Ég var mjög ánægður fyrir hönd Robbie. Hann er búinn að leggja mjög hart að sér fyrir okkur og hann verðskuldaði að skora. Núna þegar hann er búinn að skora fyrsta Evrópumarkið fyrir okkur þá vona ég að hann fari að skora fyrsta markið í Úrvalsdeildinni. Ég er handviss um að Robbie á eftir að skora miklu fleiri mörk fyrir okkur í framtíðinni. Þetta var bara byrjunin fyrir hann."

Það tók Robbie Keane drjúgan tíma að skora sitt fyrsta mark fyrir Liverpool og það var ekki fyrr en í ellefta leik sínum sem hann komst á blað. Það var líka augljóst að Robbie var mikið létt þegar hann var búinn að skora og nú er að vona að fleiri mörk fylgi í kjölfarið!