Fernando Torres er hættulegur

Torres er hættulegurJonathan Woodgate segir að hann og liðsfélagar sínir verði að passa Fernando Torres afar vel í leik liðanna á sunnudaginn.  Woodgate ætti að geta nýtt reynslu sína frá því að hann spilaði á Spáni til þess að reyna að stöðva Torres.

Woodgate hefur einnig spilað gegn Torres á Englandi en hann atti kappi við hann í 20 mínútur í fyrri leik liðanna á Anfield á leiktíðinni.

Hann sagði:  ,,Torres er framúrskarandi leikmaður, hann hefur skorað 32 mörk og það er ótrúlegt á fyrsta tímabili.  Hann hefur allt það sem maður óskar sér í framherja.  Hann er góður í loftinu, fljótur og hann skorar mörk - hann er toppleikmaður."

,,Hann hefur sýnt það í deildinni að hann er náttúrulegur markaskorari en á Spáni skoraði hann ekki mjög mörg mörk.  Það var mikil pressa á honum þar sem hann var hetja liðs Atletico Madrid en hjá Liverpool er pressan minni vegna þess að hann er með leikmenn eins og Gerrard í kringum sig.  Torres hefur staðið sig gríðarlega vel."

Fernando Torres skoraði síðbúið jöfnunarmark gegn Tottenham á Anfield fyrr á leiktíðinni í 2:2 jafntefli.