Abel í vanda staddur

Abel Xavier er í vanda staddur. Hann féll á lyfjaprófi í síðasta mánuði. Portúgalinn hélt þá sakleysi sínu fram en í síðustu viku var tilkynnt að svokallað B sýni bendi líka til þess að hann hafi tekið ólögleg lyf. Abel, sem er nú leikmaður Middlesbrough, heldur sem fyrr segir stíft fram sakleysi sínu í þessu máli en það er ljóst hann hann er nú í vondum málum. Ef Abel dæmist sekur þá verður hann fyrstur leikmanna í ensku Úrvalsdeildinni til að gerast sekur um notkun á lyfjum sem eiga að auka þrótt og þrek. Venjulega eru knattspyrnumenn settir í árs bann hjá Knattspyrnusambandi Evrópu við fyrsta brot af þessu tagi.

Abel kom til Liverpool frá Everton í janúar 2002. Hann lék 21 leik og skoraði tvö mörk áður en hann yfirgaf félagið í febrúar 2004. Eftir dvöl sína hjá Liverpool lék hann sem lánsmaður hjá Galatasaray áður en hann spilaði með Hannover 96 og Roma. Hann kom svo til Middlesbrough á þessari sparktíð. Abel er enn eini Portúgalinn sem hefur leikið með Liverpool.