Anderson inn - Welsh út

Flest þykir nú benda til þess að Paul Anderson gangi til liðs við Liverpool frá Hull í janúar. Þess í stað muni John Welsh fara í hina áttina og ganga til liðs við Hull en hann hefur verið lánsmaður hjá félaginu í vetur og leikið vel.

Eins og fram hefur komið hér á liverpool.is er Anderson aðeins 17 ára en þykir gríðarlegt efni. Hann getur bæði spilað á miðjunni og á hægri kantinum.

Stjórnarformaður Hull, Adam Pearson, segist ekki vilja missa Anderson en viðurkennir að hann eigi ekki annarra kosta völ. „Við viljum ekki missa Paul en við viljum ekki vera í þeirri stöðu að hann gangi til liðs við félagið í sumar þegar námsstyrkur hans rennur úr og að sérstök nefnd úrskurði um hvað við fáum fyrir hann. Hann vill ganga til liðs við Liverpool og mun gera það í janúar í skiptum fyrir John Welsh. Við myndum helst vilja halda Paul og fá Welsh til okkar til frambúðar en það er víst ekki hægt."