Metjöfnun!

Diogo heitinn Jota var í sviðsljósinu síðast þegar Liverpool og Nottingham Forest mættust á City Ground í Nottingham. Þá skoraði hann og jafnaði félagsmet. 

Nottinham Forest komst yfir snemma leiks. Liverpool sótti og sótti. Þar kom að Rauði herinn jafnaði. Svo var markinu lýst í leikskýrslu á Liverpool.is.

,,Á 66. mínútu komu Diogo Jota og Kostas Tsimikas inn sem varamenn fyrir Ibrahima Konaté og Andrew Robertson. Liverpool átti þá hornspyrnu frá hægri. Kostas tók hornið. Sending hans rataði beint á Diogo og hann skallaði í markið úr miðjum markteignum. Ótrúleg innkoma hjá þeim piltum. Fyrsta snerting beggja og mark. Þeir voru búnir að vera inni á vellinum í 21 sekúndu!"

Ótrúlegt mark og í leikskýrslunni kemur fram að Diogo hafi skorað eftir 21 sekúndu. Þetta var jöfnun á félagsmeti yfir tíma frá því leikmaður kom inn á sem varamaður og þar til hann skoraði. Reyndar ætti frekar að tala um andartök en tíma. 

Áður höfðu tveir leikmenn Liverpool skorað 21 sekúndu eftir að hafa komið inn sem varamenn. Hér að neðan er listi yfir fimm sneggstu mörk varamanna í sögu Liverpool.

1. Diogo Jota 21 sekúnda. 

2. Daniel Sturridge 21 sekúnda. 

3. David Thompson 21 sekúnda.

4. Igor Biscan 26 sekúndur.

5. Fabio Borini 35 sekúndur. 

Eins og þarna sést deilir Diogo félagsmetinu með þeim Daniel Sturridge og David Thompson. Tekið skal fram að hér er um deildarmörk að ræða.