Af spjöldum sögunnar!

Í dag er hálf öld liðin frá því Liverpool varð Englandsmeistari á leiktíðinni 1972/73. Þetta var áttundi Englandsmeistaratitill félagsins. 

Liverpool tryggði sér titilinn með því að gera markalaust jafntefli við Leicester City á Anfield Road. Peter Shilton markmaður Leicester var frábær í markinu og bjargaði sínu liði frá tapi en stig var nóg fyrir Liverpool. Skiljanlega var gríðarlegur fögnuður eftir leikinn. Alls voru 56.202 áhorfendur á Anfield!

Eftir leikinn fagnaði Bill Shankly eftirminnilega með stuðningsmönnum Liverpool sem dýrkuðu hann sem aldrei fyrr. Myndin að ofan var tekin fyrir framan Kop stúkuna eftir leikinn. 


Liverpool endaði leiktíðina með 60 stig úr 42 leikjum. Arsenal var þremur stigum á eftir Liverpool. Kevin Keegan og John Toshack voru markahæstir í deildinni með 13 mörk. Kevin skoraði mest allra á leiktíðinni eða 22 mörk í öllum keppnum. 

Bill Shankly gerði þarna Liverpool að Englandsmeisturum í þriðja sinn en áður varð liðið meistari 1963/64 og 1965/66 undir stjórn hans. Þarna var hann búinn að byggja upp nýtt lið sem var að mestu skipað ungum leikmönnum sem unnu fjölda titla á næstu árum. Liðið vann líka Evrópukeppni félagsliða á þessari sömu leiktíð. Bill hafði með því að byggja upp nýtt meistaralið sýnt hversu snjall framkvæmdastjóri hann var.