Varnarmaður lánaður

Sepp van den Berg hefur verið lánaður til þýska félagsins Schalke 04 til loka tímabilsins. Áður en hann fór skrifaði hann undir nýjan samning við Liverpool.

Hollendingurinn kom til félagsins árið 2019 frá PEC Zwolle en hann hefur fengið smjörþefinn af því að vera hluti af aðalliðshópnum á þessu tímabili eftir að hafa setið á varamannabekknum í öllum fjórum deildarleikjum til þessa.

Hann var á láni hjá Preston North End í næst efstu deild síðustu tvö tímabil og stóð sig heilt yfir vel hjá þeim. Nú flytur hann sig um set í sterkari deild en Schalke fóru upp í þýsku Bundesliguna í vor. Væntanlega verður van den Berg með liðinu í næsta leik, gegn Stuttgart á laugardaginn kemur.

Við óskum honum góðs gengis í Þýskalandi.