Bradley til Bolton

Bakvörðurinn Conor Bradley verður á láni hjá Bolton Wanderers á næsta tímabili. Félagið leikur í þriðju efstu deild Englands (League One).

Bradley, sem er 18 ára gamall, kom til liðs við Akademíu félagsins árið 2019 og hefur til þessa komið við sögu í fimm leikjum með aðalliði félagsins. Hans fyrsti leikur var í Deildarbikarnum gegn Norwich City og fékk hann svo einnig tækifæri í FA bikarnum og Meistaradeildinni á tímabilinu.

Hann stóð sig afar vel með U-23 ára liði félagsins á síðasta tímabili og var tilnefndur sem leikmaður ársins í úrvalsdeild yngri liða (Premier League 2).

Bradley hefur til þessa spilað átta landsleiki fyrir Norður-Írland en hans fyrsti leikur þar kom í maí í fyrra.

Hjá Bolton hittir Conor Bradley fyrir Íslendinginn Jón Daða Böðvarsson sem gekk til liðs við Bolton í janúarglugganum á þessu ári og saman munu þeir reyna að koma Bolton upp í næst efstu deild.