Neil Critchley kom Blackpool upp

Neil Critchley, fyrrum þjálfari Liverpool, kom Blackpool upp í næst efstu deild í gegnum umspil um helgina. Vel gert hjá Neil. 


Blackpool mætti Lincoln City í úrslitaleik um sæti í næst efstu deild á Wembley í gær og vann 2:1. Kenneth Dougall skoraði bæði mörkin. Kevin Stewart, fyrrum leikmaður Liverpool, spilaði með Blackpool. 

Neil tók við Blackpool í mars í fyrra eftir að hafa verið þjálfari hjá yngri liðum Liverpool í nokkur ár. Hann stjórnaði svo aðalliði Liverpool tvisvar í fjarveru Jürgen Klopp. Fyrst í Deildarbikarleik á móti Aston Villa og svo á móti Shrewsbury Town í FA bikarnum. 


Daginn áður komst Brentford upp í efstu deild eftir 2:0 sigur á Swansea City í umspilsúrslitaleik. Brentford leikur því í efstu deild í fyrsta sinn frá keppnistímabilinu 1946/47. Sergi Canos sem var á mála hjá Liverpool spilaði með Brentford. Spánverjanum hefur gengið vel hjá liðinu eftir að hann fór þangað frá Liverpool. 

Yan Danda kom inn á sem varamaður hjá Swansea. Hann ólst upp hjá Liverpool en lék aldrei með aðalliðinu.