Aftur til Ungverjalands

Liverpool og RB Leipzig spila seinni leik sinn í 16-liða úrslitum Meistaradeildar í Ungverjalandi, líkt og í fyrri leiknum.

Liðin mættust einmitt á Puskas leikvanginum þann 16. febrúar síðastliðinn þar sem okkar menn unnu góðan 0-2 útivallar sigur. Covid-19 reglur í Þýskalandi eru þannig að Þjóðverjarnir þyrftu að fara í 10 daga sóttkví við heimkomuna frá Englandi og það er víst eitthvað sem ekki gengur upp fyrir félagið.

Þessi leikur flokkast sem heimaleikur fyrir Liverpool en verður auðvitað eins langt frá því að geta talist sem slíkur og hægt er. Það getur klárlega allt gerst í leik á hlutlausum velli og við vonum auðvitað að leikmenn liðsins sýni aftur sömu gæði og í fyrri leik liðanna og klári dæmið.

Það hefur vakið athygli að Manchester City, sem leika einnig við þýskt lið í 16-liða úrslitum Meistaradeildar, fá að spila sinn leik á Etihad vellinum í Manchester. Ástæðan er sú að ekki gilda sömu reglur innan landssvæða í Þýskalandi. Í Saxlandi, þar sem Leipzig er staðsett eru strangari reglur en í Norðurrín-Vestfalíu þar sem Mönchengladbach er.