Landsleikjafréttir

Þá er síðasta landsleikjahléi ársins lokið og því ber að fagna. Hér rennum við yfir hvernig leikmönnum félagsins gekk með sínum liðum.

Á þriðjudagskvöldið var Diogo Jota í byrjunarliði Portúgal í dramatískum 3-2 sigri á Króatíu.

Takumi Minamino kom inná í seinni hálfleik þegar Japanir mættu Mexíkó í vináttuleik í Austurríki, lokatölur voru 2-0 fyrir Mexíkó.

U-21 árs lið Englendinga mætti Albaníu í undankeppni Evrópumótsins á Molineux leikvanginum í Wolverhampton. Curtist Jones kom inná á 61. mínútu leiksins og hjálpaði sínum mönnum að landa 5-0 sigri.

Á miðvikudagskvöldið voru svo fjölmargir leikir.

Hollendingar mættu Pólverjum á útivelli og þar hélt Gini Wijnaldum áfram að skora fyrir sína menn og sem fyrr var hann fyrirliði liðsins. Hann skoraði sigurmark Hollendinga seint í leiknum, lokatölur 1-2.

Wales mættu Finnum á heimavelli og sigruðu 3-1 þar sem Harry Wilson skoraði fyrsta mark leiksins. Neco Williams sat allann tímann á bekknum.

Kostas Tsimikas spilaði allan leikinn þegar Grikkir mættu Slóveníu á heimavelli og þar urðu lokatölur 0-0.

Andy Robertson var mættur á ný í byrjunarlið Skota sem mættu Ísrael á útivelli, hann spilaði allan leikinn í 1-0 tapi.

Írar mættu Búlgaríu á heimavelli og endaði leikurinn með markalausu jafntefli þar sem Caoimhin Kelleher sat á varamannabekknum.

Roberto Firmino spilaði svo allan leikinn fyrir Brasilíu í undankeppni HM hjá landsliðum í Suður-Ameríku. Brassar mættu Úrúgvæ á útivelli og sigruðu 0-2, Alisson Becker sat á bekknum og kom ekki við sögu.