Ánægður þegar upp var staðið

Virgil van Dijk sagðist vera ánægður þegar allt væri tekið með í reikninginn eftir stórleik Liverpool og Manchester City. Hollendingurinn fékk dæmt á sig víti undir lokin en sem betur fer fór það forgörðum hjá ensku meisturunum.

,,Auðvitað var frábært að spila í þessum leik. Við vorum óheppnir að skora ekki en svo var heppnin með okkur að við skyldum ekki fá á okkur mark. Það var erfitt að spila á móti meisturunum og ég er mjög ánægður með að við skyldum halda hreinu. Sérstaklega í ljósi þess að þeir fengu víti."

,,Við vildum ná okkur aftur í gang eftir tapið á móti Napoli og mér fannst við gera það. Þeir eru með gott lið og við vissum að leikurinn yrði erfiður en ég er ánægður með að við skyldum ekki tapa. Vítið var rétt dæmt og ég sagði dómaranum að hann hefði dæmt rétt eftir leikinn. Vítið hefði þó ekki átt að koma til en auðvitað er ég ánægður með að boltinn skyldi ekki fara inn í markið okkar!"

Virgil var því ánægður þegar upp var staðið eftir leikinn og hann gat andað léttar.