Daniel farinn að æfa

Daniel Sturridge er kominn á ról og farinn að æfa á Melwood. Hann var dreginn út úr leikmannahópi Liverpool í apríl og hefur alla tíð síðan verið í læknismeðferð, farið í aðgerð og svo hefur vandleg endurhæfing farið fram. Stærstur hluti þessa ferlis fór fram í Ameríku og segja má að allt hafi verið lagt í sölurnar til að koma Daniel út úr þeim meiðslavítahring sem hann var kominn í.


Daniel spilaði ekkert frá því í ágúst í fyrra og fram í lok janúar á þessu ári. Hann kom þá til baka og þrátt fyrir að skora nokkur mörk náði hann sér aldrei almennilega á strik og það endaði með því að ákveðið var að reyna að komast fyrir meiðslin. Vonandi nær Daniel nú heilsu á nýjan leik því það er ekki nokkur vafi á því að fullfrískur er hann einn besti sóknarmaður í Evrópu. Liverpool hefur saknað hans sárt og nú verður hann að komast í gang. Gengi Liverpool á þessu keppnistímabili gæti mikið til ráðist af því hvort Daniel kemst aftur til leiks af fullum krafti!