Þurfum að bæta okkur í stórleikjum!

Tap Liverpool á Wembley í gær í undanúrslitum F.A. bikarsins var mikið áfall og þá sérstaklega fyrir þá sök hversu illa liðið lék. Brendan Rodgers sagði eftir leikinn að lið hans þyrfti að bæta árangur sinn í stórleikjum. 

,,Af einhverjum orsökum vorum við taugaóstyrkir. Kannski setur það menn út af laginu þegar menn þyrstir svona rosalega mikið í að vinna eitthvað."

,,Við þurfum að bæta okkur í að takast á við svona stórleiki. Okkur hefur á stundum tekist mjög vel upp í að höndla stórleiki en ekki alltaf."

Liverpool komst í tvenn undanúrslit á leiktíðinni sem er í sjálfu sér gott en verra er að í hvorugt skiptið tókst að komast alla leið. Liverpool féll reyndar með sæmd fyrir Chelsea eftir hörkuleiki í Deildarbikarundanúrslitunum en verra gat það varla verið í gær.

Liverpool hefur aðeins unnið einn leik og gert eitt jafntefli í sjö leikjum gegn þeim liðum sem nú skipa fjögur efstu sætin í deildinni. Liverpool á útileik eftir við Chelsea í næsta mánuði sem leiðir deildina. Það var þungt yfir Brendan á Wembley í gær eftir leikinn og hann á mikið verk óunnið með liðið sitt.