Elska að vinna Everton!

Steven Gerrard er tilbúinn að spila sinn 31. leik á móti Everton í kvöld! Fyrirliðinn segist elska að vinna sigur á þeim Bláu og hann mun ekki láta sitt eftir liggja til að upplifa enn einn borgarsigurinn. 

,,Ég elska að vinna knattspyrnuleiki og ég elska að vinna á móti Everton. Þetta hefur ekkert breyst frá því ég byrjaði að spila. Þegar dregur að þessum leikjum vilja leikmenn leggja allt í sölurnar til að ná réttum úrslitum og það mun aldrei breytast. Mestu skiptir þó, sem leikmaður, að vera ekki of æstur í þessum leikjum og ekki láta tilfinningarnar ráða ferðinni og fá kannski heimskulegt rautt spjald fyrir vikið. Það er alveg hægt að æsa sig þannig upp og setja svo mikla pressu á sig að það verði erfitt að spila almennilega þegar á hólminn er komið. Þetta þurfa ungu strákarnir, sem eru að fara að spila í ,,derby" leik, að hafa í huga. Maður má ekki vera of æstur. Maður verður að hafa stjórn á tilfinningum sínum."

En fyrir utan að vera grannaslagur þá eru þrjú stig í húfi og bæði lið eru í mikilli baráttu um sæti í Meistaradeildinni. Steven segir að stigin þrjú sem eru í boði séu jafn mikilvæg og í öðrum leikjum. Á hinn bóginn gæti sigur fyrir Liverpool verið geysilega mikilvægur fyrir gengi liðsins það sem eftir er leiktíðar.

,,Þegar upp er staðið þá er þetta mikilvægur leikur í Úrvalsdeildinni og það eru þrjú sig í boði. Maður verður að leggja ríginn á milli félaganna til hliðar þegar leikurinn hefst og setja alla einbeitingu í að vinna sigur í leiknum. Fólk segir að þetta sé sex stiga leikur en mikilvægið er enn meira að mínu áliti því ef annað liðið vinnur þá gæti sigurinn orðið stökkpallur fyrir það til loka leiktíðarinnar hvað sjálfstraust og tiltrú varðar."

Það er sem sagt sama hvernig litið er á leikinn í kvöld. Mikilvægið er hrikalega mikið! Áfram Rauðliðar til sigurs!