| Sf. Gutt

Lokaleikur Robbie Fowler!

Robbie Fowler hefur aldrei opinberlega hætt að spila knattspyrnu. Hann sagði þó eftir leik Liverpool og Olympiakos að líklega væri hann núna hættur. Steven Gerrard bauð Robbie í ágóðaleikinn sinn og sá gamli kom til leiks síðustu mínúturnar við mikinn fögnuð viðstaddra. Hann var meira að segja einu sinni nærri því að skora! Robbie sagði þetta eftir leikinn í viðtali við Liverpoolfc.com. Hann sagði að það hefði verið frábært að klæðast rauðu treyjunni á nýjan leik.

,,Þetta var alveg magnað. Það er ekki margt sem slær út tilfinninguna sem fylgir því að klæðast rauðu treyjunni. Það var alveg ótrúlegt að fara úr á völlinn og fá svona góðar viðtökur. Það er eiginlega ekki hægt að lýsa þessu í orðum. Ég hef nú komið hingað aftur nokkrum sinnum en maður átti samt ekki alveg von á þessu svona."

Oft hefur verið rætt um hvar Steven Gerrard sé í röð bestu leikmanna Liverpool. Robbie telur Steven þann besta af þeim öllum!

,,Þetta var mjög ánægjulegt og ég er þakklátur fyrir þetta tækifæri. En ef satt skal segja þá snerist þetta allt um Steven. Það besta sem ég get sagt um hann er að það eru ekki margir sem komast nærri Kenny að vera besti leikmaður í sögu Liverpool. En margir telja að hann sé sá besti af þeim öllum og ég er í þeirra hópi. Það er ekkert smáræðis afrek."

Robbie sagði að líklega hefði þessi leikur með Liverpool á Anfield í ágóðaleiknum hans Steven Gerrard verið sá síðasti.

,,Ferillinn minn hefur eiginlega fjarað út ef satt skal segja. Ég hef svo sem ekki lagt skóna opinberlega á hilluna en líklega var þetta síðasti leikurinn minn og hvar er betra en að spila hann fyrir fullu húsi á Anfield í ágóðaleiknum hans Steven sem er besti leikmaður í sögu Liverpool og fyrir framan þessa stuðningsmenn. Fyrir mig var þetta alveg mögnuð stund og ég mun aldrei gleyma henni svo lengi sem ég lifi."

Robbie Fowler lék með Liverpool frá 1993 til 2001 og svo aftur eftir óvænta endurkomu 2006 til 2007. Robbie lék 369 leiki með Liverpool og skoraði 183 mörk. Hann er fimmti markahæsti leikmaður í sögu Liverpool. Hann varð Deildarbikarmeistari 1995 og 2001. Robbie vann líka F.A. bikarinn, Evrópukeppni félagsliða og Stórbikar Evrópu 2001. Óhætt er að segja að Robbie hafi verið vinsælasti leikmaður Liverpool í kringum aldamótin síðustu. Hann fylgdi Liverpool í keppnisferð sumarsins sem nokkurs konar sendiherra.   



TIL BAKA
Nýlegar fréttir
Fleiri fréttir
Fréttageymslan