Getum snúið blaðinu við!

Steven Gerrard segir tapið í Rússlandi slæmt. En hann hefur samt trú á að Liverpool geti snúið blaðinu við á Anfield Road en þar hafa jú kraftaverk gerst í gegnum tíðina. Fyrirliðinn hafði þetta að segja í viðtali eftir leik í Pétursborg
 
,,Við erum auðvitað niðurlútir eftir tvö töp í röð en við þurfum að rífa okkur upp. Það er stórleikur framundan við Swansea eftir nokkra daga og við þurfum að koma til baka. Fram á sjötugustu mínútu á móti Zenit höfðum við stjórn á leiknum. Þetta var reyndar erfitt kvöld og aðstæður voru ekki góðar. Við erum vonsviknir með að hafa fengið tvö ódýr mörk á okkur en þessari rimmu er ekki lokið."

Það hafa verið margir magnaðir Evrópuleikir á Anfield í gegnum tíðina og Steven hefur trú á því að stuðningsmenn Liverpool geti fleytt Liverpool í næstu umferð.

,,Við höfum mikið afl með okkur í gegnum stuðningsmenn okkar. Ef þeir mynda allan þann hávaða sem þeir geta myndað, fylkt sér að baki liðinu og við náð að skora snemma getur allt gerst."

Tapið í Pétursborg setur Liverpool í mjög þrönga stöðu og það verður allt að ganga upp svo að hægt verði að snúa við blaðinu í síðari leiknum. Ef rétt er munað hefur Liverpool aðeins einu sinni snúið við 2:0 tapi úr fyrri leik í Evrópusögu félagsins. Nú verður það sama að gerast ef halda á einhverju almennilegu lífi í þessu keppnistímabili!