Hvorugt liðið sigurstranglegra fyrirfram

Jamie Carragher segir að það sé engan veginn hægt að segja að annað liðið sé sigurstranglegra en hitt fyrir borgarslaginn á Wembley á morgun.

,,Everton hefur spilað vel að undanförnu og eru fyrir ofan okkur í deildinni. Við unnum dýrmætan sigur á þriðjudaginn og erum vonandi búnir að ná okkur á strik eftir erfiða hrinu. Áður en sú lægð skall á unnum við góðan sigur á Everton", segir Carra í viðtali við SkySports.

,,Það skiptir engu máli hvort liðið er sagt sigurstranglegra fyrirfram, þetta getur farið hvernig sem er."

Leikurinn á morgun fer fram degi áður en menn minnast þess á Anfield að 23 ár eru liðin frá Hillsborough slysinu sem kostaði 96 stuðningsmenn Liverpool lífið.

,,Þetta er sérstök helgi og 15. apríl er fólkinu í Liverpool alltaf erfiður. Á minningarathöfninni á sunnudag sameinumst við til þess að minnast allra þeirra sem létu lífið 1989. Áður en að því kemur getum við vonandi glatt stuðningsmennina með góðum leik á morgun."