Sannfærandi sigur á Úlfunum

Kenny Dalglish gerði fimm breytingar á liði sínu frá sigurleiknum gegn Manchester United á laugardag. Jay Spearing, Craig Bellamy, Glen Johnson, Dirk Kuyt og Charlie Adam komu inn í liðið á kostnað Martin Kelly, Jamie Carragher, Stewart Downing, Maxi Rodriguez og Steven Gerrard. Þeir tveir síðastnefndu voru ekki í hópnum, en hinir þrír sátu á bekknum.

Liverpool byrjaði leikinn af miklum krafti og strax á 3. mínútu var Dirk Kuyt nálægt því að skora eftir góðan undirbúning Craig Bellamy og Andy Carroll. Hollendingurinn var hinsvegar óheppinn að fá boltann í lærið og einhvernveginn vildi boltinn ekki inn að þessu sinni.

10 mínútum síðar kom fyrsta færi Wolves þegar Edwards komst inn fyrir Agger. Pepe Reina bjargaði vel.

Á 20. mínútu átti Henderson góða sendingu inn fyrir vörn heimamanna á Craig Bellamy sem renndi boltanum framhjá Hennesey í marki Wolves, en einnig markinu.

Aðeins þremur mínútum síðar bjargaði Hennesey naumlega þegar Agger skallaði boltann að marki eftir hornspyrnu Bellamy.

Hinum megin átti Steven Fletcher góðan skalla yfir mark okkar manna eftir hornspyrnu örfáum mínútum síðar.

Þannig leið fyrri hálfleikurinn, sem var opnari og skemmtilegri en menn þorðu að vona fyrirfram. Nokkuð jafnræði var með liðunum, en Liverpool var þó heldur hættulegra liðið. 

Á 35. mínútu vildi Charlie Adam fá vítaspyrnu þegar hann féll í vítateig heimamanna. Erfitt var að dæma um réttmæti kröfu Skotans í endursýningu, en einhverjir dómarar hefðu vafalaust dæmt víti. Snertingin var þó ábyggilega ekki mikil. 

Á 37. mínútu átti Bellamy gott skot úr aukaspyrnu sem Hennesey varði vel og á síðustu andartökum hálfleiksins átti Henderson ágætt skot sem Hennesey varði sömuleiðis. 

Staðan markalaus á Molineaux í hálfleik, en leikurinn hin ágætasta skemmtun.

Í seinni hálfleik má síðan segja að okkar menn hafi tekið öll völd á vellinum.

Fyrsta mark leiksins kom á 52. mínútu. Þá tók Bellamy innkast á vinstri kanti, henti boltanum á Adam sem sá gott hlaup Andy Carroll hinum megin og ákvað að senda á framherjann stórfætta. Sendingin var hárnákvæm, beint fyrir fætur Carroll sem kláraði færið laglega. Staðan 0-1 fyrir okkar menn og fögnuður Carroll innilegur. Skiljanlega.

Tæpum 10 mínútum síðar fékk Craig Bellamy boltann á miðjum vallarhelmingi Wolves og brunaði umsvifalaust í átt að markinu. Við 16 metra markið lét hann skotið ríða af. Hennesey var nálægt því að verja, en ekki nægilega. Staðan orðin 0-2 og staða gestanna orðin vænleg.

Á 69. mínútu átti Agger ágætan skalla að markinu, en rétt framhjá. Fimm mínútum síðar átti Dirk Kuyt gott skot að marki, en varnarmaður Wolves var fyrir boltanum og horn var niðurstaðan. 

Á 77. mínútu kom síðan þriðja og síðasta mark Liverpool í leiknum. Það kom eftir laglegt skyndiupphlaup - og eina af fáum markverðum sóknum heimamanna það sem af var seinni hálfleik. Reina kýldi boltann frá eftir hornspyrnu heimamanna, Enrique tók við boltanum og sendi frábæra sendingu fram á Kuyt. Eftir laglegan þríhyrning við Charlie Adam skaut Hollendingurinn að marki og skoraði markið sem gerði endanlega út um leikinn. Staðan 0-3.

Strax eftir markið gerði Dalglish tvær breytingar. Hann tók Agger og Adam útaf og setti Carragher og Shelvey inn á. 

Á 84. mínútu átti Carroll skalla fram hjá marki Wolves eftir hornspyrnu Bellamy. Það másegja að þetta hafi verið síðasta færi okkar manna í leiknum því þegar hér var komið sögu voru menn farnir að slaka dálítið á klónni og heimamenn farnir að komast aðeins inn í leikinn eftir að hafa átt í vök að verjast allan seinni hálfleikinn. 

Á 90. mínútu kom Fabio Aurelio inn á fyrir Dirk Kuyt og þremur mínútum síðar flautaði Anthony Taylor dómari leiksins til leiksloka. Niðurstaðan á Molineaux 0-3. Góður sigur okkar manna og dýrmæt þrjú stig í sarpinn.

- Tvö marka Liverpool í þeim leik skoraði Fernando Torres. Það reyndist síðasta mark kappans fyrir Liverpool

- Andy Carroll skoraði fimmta mark sitt á leiktíðinni.

- Craig Bellamy skoraði í níunda sinn og er nú orðinn markahæstur leikmanna Liverpool. 

- Dirk Kuyt skoraði þriðja mark sitt á þessari leiktíð. Markið sem Dirk skoraði í kvöld var fimmtugasta deildarmark hans fyrir félagið. Aðeins Robbie Fowler (128), Michael Owen (118), Steven Gerrard (86) og Fernando Torres (65) hafa skorað fleiri Úrvalsdeildarmörk fyrir Liverpool