Vonandi viðsnúningur

Kenny Dalglish vonast til þess að dæmið snúist við í kvöld frá því Liverpool tapaði illa 3:0 fyrir Manchester City í annarri umferð deildarkeppninnar í ágúst. Það var fyrsta tap Liverpool á valdatíð Roy Hodgson og sumir telja að liðið hafi aldrei jafnað sig á því tapi á meðan hann stjórnaði liðinu.    

,,Manchester City vann nokkuð sannfærandi sigur það kvöldið og mér fannst sigur þeirra sanngjarn. Við eigum ekki góðar minningar frá leiknum sem var aðeins annar leikur okkar á keppnistímabilinu. Við munum reyna okkar besta til að snúa dæminu við."

Liverpool hefur ekki spilað deildarleik á Anfield Road frá því liðið vann frækinn 3:1 sigur á Manchester United í síðasta mánuði. Nú er lið frá Manchester aftur mætt til Liverpool og það væri magnað ef Rauði herinn myndi aftur fagna sigri á liði frá borginni þeirri. 

Liverpool þarf á öllu sínu að halda ef liðið á að ná fimmta sæti deildarinnar og hvað þá einhverju þar fyrir ofan. Það er lágmark á ná fimmta sætinu til að komast í Evrópukeppni og hvert einasta stig skiptir máli í þeirri baráttu.