Martin ætlar að vinna titil!

Slóvakinn Martin Skrtel er ákveðinn í að vinna titil áður en hann fer frá Liverpool. Evrópudeildin gefur möguleika á því að vinna til verðlauna en til þess þarf Liverpool að vinna sigur á Sparta Prag í kvöld.

,,Ef ég teldi að ég gæti ekki unnið titla myndi ég yfirleitt ekkert vera að spila knattspyrnu. Ég er ánægður hérna og skrifaði undir samning sem gildir í fjögur ár. Ég trúi því að ég muni vinna eitthvað með Liverpool á þeim tíma."

,,Mér finnst að við séum að spila í stórgóðri keppni og þetta er næst mikilvægasta keppnin sem hægt er að taka þátt í í Evrópu. Allir spila knattspyrnu til að vinna titla. Evrópudeildin gefur okkur gott færi á því og ef það tekst myndi það bjarga leiktíðinni fyrir okkur."

,,Við lékum ekki vel til að byrja með á keppnistímabilinu og ég var ekki nein undatekning í því. Ég veit að ég gat gert betur en svona er knattspyrnan. Stundum leikur maður vel og svo gengur ekki vel inni á milli. Ég reyni þó að leggja hart að mér og gera mitt besta fyrir félagið."