Kelly er leikfær

Martin Kelly mun vera leikfær fyrir leikinn gegn Blackpool. Þar með leysast líklega vandræðin sem Roy Hodgson stóð frammi fyrir með vinstri bakverði.

Liverpool Echo segir frá því að Martin Kelly sé klár í slaginn fyrir Blackpool, en hann meiddist lítillega í 0-0 leiknum við Utrecht á fimmtudaginn. Talið var að hann yrði ekki leikfær og þar með hefði Roy Hodgson ekki átt neinn heilan vinstri bakvörð, en Fabio Aurelio og Paul Konchesky eru báðir meiddir auk Daniels Agger sem einnig hefur leyst bakvarðarstöðuna á þessari leiktíð.

Kelly, sem er í U-21 árs landsliði Englendinga, hefur staðið sig vel í Evrópudeildinni á leiktíðinni og Roy Hodgson hefur treyst honum það vel að hann hefur spilað alla leiki okkar manna í þeirri keppni. Það verður því að teljast líklegt að þessi ungi og efnilegi leikmaður verði í fyrsta sinn í byrjunarliði í Úrvalsdeildarleik í leiknum gegn Blackpool.