| Sf. Gutt

Ekkert mál!

El-Hadji Diouf, fyrrum leikmaður Liverpool, segir ekki mikið mál að vinna á Anfield Road. Blackburn Rovers kemur í heimsókn til Liverpool á morgun og El-Hadji er kokhraustur eins og svo oft áður.

"Það er ekki erfitt að fara þangað og vinna. Á Englandi geta allir unnið alla."

Stuðningsmenn Liverpool taka venjulega mjög vel á móti sínum gömlu leikmönnum en El-Hadji Diouf hefur nú aðeins fengið að heyra það eftir að hann yfirgaf félagið. Hann hegðaði sér heldur ekki alltaf eins og leikmenn Liverpool eiga að gera. El-Hadji kvíðir engu þótt eitthvað verði baulað á hann. 

"Mér er alveg sama þótt það sé baulað á mig. Ég gæti ekki spilað ef það væri ekki baulað á mig og ég þrífst á því. Ég er karlmaður og þarf að sýna fólki að svo sé."

El-Hadji Diouf kom til Liverpool sumarið 2002 fyrir háa upphæð. Hann lék tvær leiktíðir með Liverpool en náði aldrei að standa undir nafni. Hann lék 80 leiki og skoraði sex mörk. Senegalinn varð Deildarbikarmeistari 2003 þegar Liverpool vann Manchester United 2:0 í úrslitum.
 
Það má búast við hörkuleik á morgun og ekki hafa ummæli Sam Allardyce framkvæmdastjóra Blackburn, nú fyrir leikinn, minnkað líkurnar á því að hart verði barist. Hann segir Rafael Benítez hafa látið leikmenn sína fara að spila gróft til að koma sér í gang eftir slakt gengi. Sam hafði, eins og margir muna, uppi stór orð um Rafael á síðustu leiktíð.








TIL BAKA
Nýlegar fréttir
Fleiri fréttir
Fréttageymslan