Steven ánægður með sigurinn!

Það slær fátt út að leggja Everton að velli. Það er því ekki að undra að Steven Gerrard, fyrirliði Liverpool, hafi verið ánægður með sigurinn í gær. Hann hafði þetta að segja í viðtali eftir sigurinn sæta!
 
"Þetta var erfiður derby leikur. Bæði liði léku af eldmóði, ákveðni og það var hart barist. Við lögðum gott lið Everton að velli í dag með tíu mönnum og strákarnir eiga hrós skilið."

Fyrir þennan leik hafði Everton leikið níu deildarleiki í röð án taps. Bláliðar voru því brattir þegar þeir komu til leiks.

"Þeir voru á mikilli siglingu en við unnum þá þótt við værum aðeins tíu inni á vellinum. Við spiluðum góða knattspyrnu á köflum og erum virkilega ánægðir. Hugarfarið okkar var frábært og við stóðum þétt saman."

Staða Liverpool, í baráttunni um fjórða sætið hefur lagast mikið síðustu vikuna. Næstu tveir leikir eru á útivöllum gegn Arsenal og Manchester City. Það verða erfiðir leikir en Steven er bjartsýnn á hagstæð úrslit.

"Við erum ánægðir með úrslitin en núna eru tveir erfiðir útileikir framundan. En ef við höldum áfram á sömu braut hef ég fulla trú á að við náum stigum úr þessum leikjum."

Steven Gerrard lék mjög vel gegn Everton og hann virðist vera að ná sér í gang eftir meiðslin. Það eitt eru frábærar fréttir fyrir Liverpool enda erfið verkefni framundan.