Johnson og Aurelio ekki með á morgun

Það eru ótrúleg forföll í liði Liverpool fyrir leikinn gegn Lyon á morgun.  Liðið lenti í Lyon rétt eftir hádegið að frönskum tíma og ljóst er að þeir Glen Johnson og Fabio Aurelio verða hvorugir með þar sem þeir eru enn að jafna sig á meiðslum í kálfa.

Þó bárust góðar fréttir af þeim Daniel Agger, Alberto Aquilani og David Ngog en þeir ferðuðust allir með liðinu og ættu að geta spilað á miðvikudagskvöldið.  Unglingarnir Daniel Ayala, Jay Spearing og Damien Plessis eru einnig í leikmannahópnum.

Hópurinn samanstendur af eftirfarandi leikmönnum:  Reina, Cavalieri, Carragher, Ayala, Darby, Insua, Agger, Kyrgiakos, Kuyt, Lucas, Benayoun, Aquilani, Babel, Mascherano, Spearing, Plessis, Ngog, Voronin og Torres.