| Ólafur Haukur Tómasson

Dossena: Markmiðin hafa ekkert breyst

Ítalski bakvörðurinn Andrea Dossena var á varamannabekknum í fyrsta leik Liverpool á tímabilinu þegar liðið beið lægri hlut gegn Tottenham á sunnudaginn var.

Hann segir að liðið hafi ekki spilað vel en þó svo að liðið hafi tapað í fyrsta leiknum þá er alls ekki hægt að útiloka liðið frá því að enda uppi sem Englandsmeistari. Einnig gefur hann það í skyn að hann sé reiðubúinn í mikla baráttu til að vinna sér inn sæti í liðinu.

"Í fyrri hálfleiknum á sunnudaginn spiluðum við ekki af nægri ákveðni og hraða. Í seinni hálfleiknum vorum við örlítið betri en það var ekki nóg. Þetta var óvænt því við bjuggumst ekki við því að hefja tímabilið á tapi.

Það hefur þó ekkert breyst hvað varðar markmið okkar á tímabilinu. Ágúst er hálfnaður og það er nægur tími fyrir okkur til að snúa við taflinu. Við verðum bara að leggja hart að okkur á æfingasvæðinu." sagði Dossena.

Einnig skaut hann því fram að hann væri ekki á förum frá Anfield og heldur hann því fram að hann er hæst ánægður með að vera leikmaður Liverpool.

"Ég hef heyrt margar sögusagnir um framtíð mína í sumar en sannleikurinn er sá að ég vil vera áfram hjá Liverpool. Ég er ánægður með samherja mína, stjórann og félagið. Ég hef aldrei viljað fara."

Ferill Dossena hjá Liverpool hefur alls ekki verið talinn glæstur þó stuttur sé, hann var keyptur á sjö milljónir punda frá Udinese fyrir síðustu leiktíð en hann lék aðeins 26 leiki fyrir liðið á síðustu leiktíð en skoraði tvö glæsileg mörk gegn Manchester United og Real Madrid. Það er svo aldrei að vita hvort að ferill hans gæti tekið mikla stefnu upp á við eftir að samlandi hans, Alberto Aquilani, var keyptur til Liverpool fyrir skömmu.
TIL BAKA
Nýlegar fréttir
Fleiri fréttir
Fréttageymslan