Ryan Flynn lánaður til Falkirk

Miðjumaðurinn tvítugi Ryan Flynn mun vera allt næsta tímabil á láni hjá skoska félaginu Falkirk en þaðan kom hann einmitt til Liverpool.

Flynn var lykilmaður í unglingaliðunum sem unnu FA-Unglingabikarinn og skoraði hann m.a. gegn Manchester City í úrslitaleiknum árið 2006.  Árið 2007 skoraði hann þrjú mörk í keppninni.

Hann spilaði einnig með varaliðinu sem varð Englandsmeistari í varaliðsdeildinni árið 2008.  Hann var lánaður til Wrexham seinni part síðasta tímabils og skoraði hann fjögur mörk í 21 leik.

Hann hefur enn ekki spilað leik með aðalliði Liverpool en hann hefur tekið þátt í undirbúningstímabili með liðinu og spilað þar sjö leiki.