Við erum eitt af bestu félögum í Evrópu

Rafa Benítez segir að Liverpool hafi skipað sér á stall sem eitt besta félagslið Evrópu.  Þrátt fyrir að enda tímabilið án þess að vinna bikar segir Benítez að sterk atlaga liðsins að titlinum á Englandi hafi sýnt gæði liðsins.  Hann segist jafnframt vera ánægður með framför liðsins á þessu tímabili.

Benítez vill að sjálfsögðu sigur gegn Tottenham á morgun (sunnudag) en það mun tryggja liðinu 86 stig og þar með besta árangur félagsins í ensku Úrvalsdeildinni.

,,Ég held að við séum augljóslega eitt af bestu liðum Evrópu núna," sagði Benítez.  ,,Við höfum sýnt það í Meistaradeildinni undanfarin ár og nú höfum við sýnt það líka í ensku deildinni með því að vera svo nálægt United allt til loka tímabilsins."

,,Við höfum ekki unnið neina bikara en tímabilið hefur engu að síður verið mjög gott og við höfum sýnt miklar framfarir.  Þegar talað er um sigur í ensku Úrvalsdeildinni þá verður maður alltaf að muna að hin liðin eru svo sterk og toppliðin svo góð að þó maður slái stigametið hjá sínu eigin félagi þá dugar það ekki til sigurs í deildinni."

,,Það er mikilvægt að sýna að við getum gert atlögu að titlinum og okkur tókst það nú, það sendir út skýr skilaboð fyrir framtíðina.  Við vitum að 83 stig er góður árangur en 86 væri enn betra þannig að sigur í síðasta leik er það mikilvægasta, sem og að spila vel fyrir framan stuðningsmenn okkar."

Félagið hefur unnið 9 af síðustu 10 leikjum sínum í Úrvalsdeildinni, eini leikurinn af þessum 10 þar sem stig hafa tapast var 4-4 leikurinn gegn Arsenal.  Benítez er mjög ánægður með form liðsins.

,,Sem stjóri veit maður að mistök verða gerð því það er aldrei hægt að tryggja það að allt verði fullkomið í hverjum leik," bætti Benítez við.  ,,En það er líka mikilvægt þegar rætt er um leiki sem við höfum gert jafntefli í að við unnum líka mikið af leikjum sem hefðu annars endað með jafntefli."

,,Það er því aldrei hægt til um þessa hluti að fullu fyrr en eftir tímabilið en þegar maður stendur uppi með 83 eða 86 stig þá veit maður að það er varla hægt að gera mikið betur."

Benítez segir að aukinn skilningur á milli leikmanna sé lykilatriði í góðu gengi félagsins og hvetur hann leikmenn sína til þess að halda áfram á næsta tímabili.

,,Skilningurinn á milli leikmanna seinni helming tímabilsins hefur verið mjög góður.  Skilningurinn var góður fyrri hluta tímabilsins en enn betri þann síðari.  Við höfum séð leikmenn eins og Benayoun, Gerrard og Lucas sem hafa allir spilað betur seinni hluta tímabilsins og það var mikilvægt fyrir mig.  Aðalatriðið er að við höldum stöðugleika, það er alltaf það mikilvægasta þegar rætt er um Úrvalsdeildina."