Fabio Aurelio kominn í sumarfrí

Það á ekki af Fabio Aurelio að ganga. Hann var borinn meiddur af leikvelli gegn Chelsea í gærkvöldi og samkvæmt fréttum þá mun hann ekki leika meira á leiktíðinni.

Fabio meiddist illa á nára og það munu sama og engar líkur á að hann verði búinn að ná sér áður en þessari leiktíð lýkur.

Fabio er búinn að leika vel núna eftir áramótin og hann er besti kosturinn í stöðu vinstri bakvarðar. Hann hefur einfaldlega tekið stöðuna af John Arne Riise á þessari leiktíð. Þetta er því mikið áfall fyrir Liverpool.

Brasilíumaðurinn er búinn að vera mjög óheppinn með meiðsli á þessum tveimur leiktíðum sem hann er búinn að vera hjá Liverpool. Skemmst er að minnast þess að hann sleit hásin undir vorið í fyrra og meira væri hægt að nefna í sambandi við hrakfarir hans. Fabio er búinn að leika 54 leiki með Liverpool og skora eitt mark.