Steven Gerrard jafnar félagsmet

Steven Gerrard gerir það ekki endasleppt þessa dagana. Hann skorar og skorar og  og spilar eins og herforingi. Í gærkvöldi fór hann á kostum gegn Porto. Hann lagði upp tvö mörk og skoraði svo eitt mark úr vítaspyrnu.

Með því að skora gegn Porto jafnaði Steven félagsmet í markaskorun í Evrópukeppni. Markið var 22. mark hans í Evrópukeppni. Hann hefur þar með skorað jafn mörg Evrópumörk og Michael Owen. Segja má að það sé næsta víst að Steven slái metið sem Michael hefur átt frá leiktíðinni 2003/2004 fyrr en síðar.

Hér er listi yfir markahæstu leikmenn Liverpool í Evrópukeppni.

1. Steven Gerrard 22 mörk

2. Michael Owen 22 mörk

3. Ian Rush 20 mörk

4. Roger Hunt 17 mörk

5. Terry McDermott 15 mörk

Í heildina hefur Steven Gerrard nú skorað 83 mörk fyrir Liverpool í 406 leikjum.