Þrír meiddir eftir rimmuna gegn Arsenal

Leikurinn gegn Arsenal var dýrkeyptur. Þrír leikmenn Liverpool eru meiddir eftir rimmuna. Þar af meiddust tveir sem voru að koma úr meiðslum.

Fernando Torres kom inn í liðið eftir meiðsli en entist bara fyrri hálfleikinn. Hann virtist ekki vera almennilega leikfær og kannski fór hann of snemma af stað eftir meiðslin.

Xabi Alonso haltraði af leikvelli um miðjan síðari hálfleik. Hann meiddist á rist en þetta var fyrsti leikur hans eftir ristarbrot. Það er ekki vitað á þessari stundu hvort gömlu meiðslin voru að taka sig upp.

Til að bæta gráu ofan á svart þá er Javier Mascherano lemstraður eftir leikinn. Hann fékk spark í annan fótinn og haltraði um tíma. Það var á hinn bóginn ekki hægt að skipta honum af velli því búið var að nota alla skiptimennina.

Það mun skýrast á næstu dögum hversu alvarleg meiðsli þessara þremenninga eru. Í bili verðum við að vona það besta.