Helmingslíkur á að Alonso spili

Xabi Alonso er í kapphlaupi við tímann um að jafna sig af brotnu beini í fæti fyrir leikinn gegn Everton.  Hann er byrjaður að æfa á fullu eftir að hafa verið aðallega í líkamsræktarsalnum eftir að meiðslin komu upp.

,,Ég hef tekið framförum," sagði Alonso við opinbera heimasíðu Liverpool.  ,,Síðustu daga hef ég byrjað að skokka á ný á vellinum, það eru góðar fréttir vegna þess að ég hef verið að eyða mínum tíma í líkamsræktarsalnum."

,,Það er mikill léttir að vera farinn að æfa aftur úti á vellinum og eins og staðan er núna þá lítur þetta vel út, en ég veit ekki hvort ég nái að vera klár í leikinn gegn Everton."

,,Sú staðreynd að þetta er nágrannaslagur gerir mig ekkert æstari í að spila.  Ég er alltaf áfjáður í að ná mér sem fyrst eftir meiðsli.  Ég vil koma til baka eins fljótt og auðið er en ég verð að hugsa um fótinn.  Ég verð að sjá til hvernig mér líður í fætinum þegar nær dregur."

Ef Alonso nær ekki að spila gegn Everton er mjög líklegt að hann spili gegn Besiktas í Tyrklandi á miðvikudaginn í næstu viku.