Luis Garcia seldur til Atletico Madrid

Salan á Luis Garcia til Atletico Madrid var staðfest í dag þegar hann skrifaði undir samning við spænska félagið.  Garcia var vinsæll leikmaður hjá Liverpool og óskum við honum alls hins besta hjá nýju félagi.

Í viðtali í dag sagði Garcia:  ,,Þetta var erfið ákvörðun vegna þess að það er sárt að þurfa að fara frá einu besta félagi í heiminum í dag og þetta er félag sem á hvað bestu stuðningsmennina."

,,Ég hef notið þriggja frábærra ára þarna.  Það eru nokkrar ástæður fyrir brottför minni og ég þurfti að hugsa málið vel.  En Liverpool munu ávallt vera í huga mér vegna þess að allir tóku mér vel þar."

,,Ég var svo heppinn að vinna bikara þarna en ég vildi ekki sleppa því tækifæri að eiga möguleika á því að vinna bikara á Spáni."

Garcia verður minnst fyrir nokkur frábær mörk eins og t.d. gegn Juventus í Meistaradeildinni árið 2005, gegn Chelsea í undanúrslitum FA bikarsins árið 2006, og varla þarf að minnast á eitt mikilvægasta mark hans á ferlinum, gegn Chelsea í undanúrslitum Meistaradeildarinnar árið 2005.  Hann skoraði einnig gegn Everton á Anfield á tveimur fyrstu tímabilum sínum og því verður að segjast að hann var leikmaður sem naut þess að spila í stórum leikjum.

Garcia spilaði alls 121 leik fyrir félagið og skoraði hann 30 mörk.  Vonandi gengur honum vel hjá nýju félagi og notum við tækifærið og óskum honum velfarnaðar á nýjum vettvangi.