Gomez farinn að æfa með bolta og skokka

Joe Gomez, sem verið hefur frá vegna meiðsla síðan í nóvember, er sífellt að færast nær því að verða heill. Hann birti myndskeið á Instagram í gær þar sem hann sést vinna á fullu í tækjasalnum og er farinn að vinna með bolta. Hann er einnig farinn að skokka á æfingasvæðinu.

Joe Gomez meiddist á landsliðsæfingu í nóvember þegar sin í vinstra hnénu hans skemmdist og hefur Klopp gefið út, rétt eins og með Virgil van Dijk, að ólíklegt sé að hann leiki eitthvað með liðinu á þessu keppnisímabili. Talið er að van Dijk sé þó öllu nær því að komast í leikhæft ástand en Gomez en Klopp hefur meira segja sagt að þeir séu ólíklegir til að taka þátt í EM í knattspyrnu í sumar.

Gomez sendi jafnframt frá sér skilaboð þar sem kemur fram að endurhæfingin verði aðeins tekin skref fyrir skref.

Þetta verða að teljast góðar fréttir því við höfum sannarlega saknað kappans. Það er engu að síður en töluverð vinna eftir hjá Gomez til að ná heilsu, en hann hefur gengið í gegnum svipaða hluti áður og kemur örugglega sterkari til baka á næsta tímabili.