Ótrúleg skotnýting!

Divock Origi innsiglaði sigur Liverpool í Madríd. Skotnýting hans í Meistaradeildinni, á leiktíðinni 2018/19, var ótrúleg því öll skot Belgans í keppninni sem rötuðu á markið fóru alla leið í netið!


Divock skoraði tvö mörk á móti Barcelona í undanúrslitum Meistaradeildarinnar í ógleymanlegum 4:0 sigri. Fyrra markið kom Liverpool á bragðið snemma leiks og það seinna kom Rauða hernum alla leið í úrslitaleikinn í Madríd. Í leiknum gegn Barcelona átti Belginn sem sagt tvö skot sem hittu á markrammann og bæði urðu að mörkum!


Í úrslitaleiknum í Madríd innsiglaði Divock 2:0 sigur Liverpool á Tottenham Hotspur þegar leið að leikslokum. Í leiknum átti Divock eitt skot á markrammann og boltinn fór að sjálfsögðu í markið!

Óhætt er að segja að skotnýting Divock Origi í Meistaradeildinni á þessari ógleymanlegu leiktíð hafi verið ótrúleg. Mörkin þrjú eru auðvitað í flokki mikilvægustu marka í sögu Liverpool!