Joe Gomez farinn að æfa

Varnarmaðurinn efnilegi Joe Gomez er farinn að æfa aftur eftir erfið meiðsli. Joe sleit krossband í fyrrahaust og það hefur tekið langan tíma að komast aftur til heilsu.

Það á svo eftir að sjá hvort Joe nær sér að fullu. Hann hafði spilað mjög vel í þeim sjö leikjum sem hann var búinn að spila frá því hann var keyptur frá Charlton Athletic og framganga hans lofaði góðu. Vonandi nær hann sér aftur á strik.  

Joe tók þátt í æfingaleik í dag og það var stórt skref í bataferlinu. Liverpool vann  Accrington Stanley 5:0 og spilaði Joe einn hálfleik. Rhian Brewster skoraði þrennu og þeir Emre Can og Harry Wilson eitt hvor. Nokkrir af þeim aðalliðsmönnum Liverpool sem voru ekki í landsliðum spiluðu í leiknum. Loris Karius stóð í markinu og að auki komu Lucas Leiva, James Milner, Alberto Moreno, Joel Matip og Emre Can við sögu.