Origi frá út tímabilið og eitthvað fram á sumar

Nú hefur verið staðfest að hin fólskulega tækling sem Divock Origi varð fyrir í leiknum við Everton á miðvikudaginn mun kosta hann restina af leiktíðinni og að öllum líkindum EM líka.

Origi var borinn af velli á miðvikudagskvöldið eftir tæklingu Rafael Funes Mori í liði Everton. Nú er búið að skoða piltinn rækilega og fyrstu niðurstöður leiða í ljós að hann verði frá í að minnsta kosti 4-6 vikur.

Þetta eru auðvitað herfilegar fréttir fyrir Liverpool því Origi hefur verið sjóðheitur upp á síðkastið. Að sama skapi eru þetta vond tíðindi fyrir belgíska landsliðið því væntanlega verður Origi ekki leikfær í tæka tíð fyrir EM.