Rafa hefur trú á sínum mönnum

Rafael Benítez hefur trú á sínum mönnum til góðra verka í Marseille í kvöld. Hann telur að leikmenn sínir búi yfir nægri reynslu til að klára verkefnið sem bíður við Miðjarðarhafið.

"Við vitum hvernig við eigum að leika þegar við erum undir álagi. Til að vinna titla þurfum við að taka þátt í úrslitaleikjum. Eins og staðan er núna hjá okkur þá er þetta úrslitaleikur fyrir okkur. Við þurfum að spila mjög vel í Marseille ef við eigum að geta komist áfram. Svona er knattspyrnan. Við þurfum að vera einbeittir, undirbúa okkur vel og reyna að finna leiðir til að vinna leikinn. Þetta verður leikur fyrir góða leikmenn með sterka skapgerð og við eigum leikmenn í okkar liði sem hafa báða þessa kosti."