Patrik Berger

Berger sagði við umboðsmanninn sinn að hann gæti ekki unnið lengur undir stjórn Evans. "Ég fékk svo tilboð um að ganga til liðs við AS Roma og umboðsmaðurinn minn talaði við Peter Robinson en hann sagði mér að vera þolinmóður, kannski væri von á nýjum framkvæmdastjóra. Herra Robinson sagði að að nýji framkvæmdastjórinn myndi ákveða hvort að ég yrði áfram hjá félaginu eða látinn fara. Ég var í fríi í Prag þegar Houllier tók við. Um leið og ég kom tilbaka fann ég að hann vildi hafa mig áfram hjá félaginu. Ég tók áhættu að vera áfram hjá félaginu vegna þess að Gerard Houllier var látinn starfa við hlið Evans í staðinn fyrir að skipta Evans út. Ýmsar breytingar áttu sér stað og strax í upphafi vissi ég hver væri stjórinn.
Aðstæður á Anfield komu mér á óvart er ég kom hingað frá Borussia Dortmund. Liverpool er mun stærri klúbbur en Dortmund var mun agaðri klúbbur. Liverpool var eins og 2. eða 3. deildar klúbbur ekki eins og Liverpool sem ég vænti. Ég varð fyrir vonbrigðum með æfingarnar og allt skipulagið. Hlutirnir eru allt öðruvísi núna. Við vitum allt um andstæðinga okkar, hver einasti leikmaður er skilgreindur. Houllier hefur fært mig inn á miðjuna. Ég er ekki vinstri kantur, maður fær boltann ekki nógu oft í þeirri stöðu. Ég lék ávallt sem unglingur á miðjunni eða rétt fyrir aftan framherjana og einnig með landsliðinu. Ég hef frjálsari hendur þar."

Patrik gekk mjög vel í æfingaleikjum fyrir leiktíðina og skoraði falleg mörk. Þegar tímabilið hófst var hann í byrjunarliðinu en var slakur í tveim fyrstu leikjunum. Houllier sýndi honum þolinmæði og hún var ríkulega launuð. Berger var frábær í næsta leik gegn Newcastle, barðist eins og ljón og skoraði glæsilegt mark í 4-1 sigri. 19. september skoraði hann gegn Charlton í 3-3 jafntefli og 4 mark hans í 5 leikjum komið á blað. Mark Berger gegn Charlton var sannkallað augnayndi. Hann sveiflaði vinstri fætinum ríflega 25 metra frá marki Charlton og hálfu augnabliki síðar lenti boltinn upp í vinklinum. En Berger var ekki bara á skotskónum með Liverpool. Í landsleik Tékklands og Eistlands 14. október skoraði hann tvö glæsileg mörk í 4-1 sigri. Fyrra markið kom af 25 metra færi beint úr aukaspyrnu af hægri vallarhelmingi, boltinn þeyttist efst í hægra hornið og seinna markið af u.þ.b. 20 metra færi beint úr aukaspyrnu á móts við vítateigshorn hægri vallarhelmings, sannkallaður bananabolti skrúfaðist í mitt fjærhornið. Drengurinn var greinilega snaróður í þessum leik sem endranær og því ekki einkennilegt að hann sé oft spurður að því hvort hann æfi aukaspyrnur sérstaklega? "Nei, alls ekki. Ég hef aldrei æft aukaspyrnur. Ég stilli bara boltanum upp, tek gott tilhlaup og negli að marki í von um að skora! Flóknara er það nú ekki!"

Í byrjun nóvember var mikilvægur leikur gegn Valencia í Evrópukeppninni. Fyrri leikurinn fór 0-0 á Anfield og Liverpool var 2-0 undir er um tíu mínútur voru til leiksloka á Spáni og á leið út úr Evrópukeppninni. En á 81. mínútu tók Owen á rás og smellti boltanum á hausinn á Macca og þaðan í netið. Á 86. mínútu hleypti Berger af með vinstri og boltinn skall í netinu. Leikurinn endaði 2-2 og mætti Liverpool öðru spænsku liði Celta Vigo en féll þá út. Um mánuði síðar var aftur komið að frábærri aukaspyrnu og nú varð Tottenham fyrir barðinu á vinstri sleggjunni. Berger meiddist snemma í apríl og var ekki með aftur fyrr en í lokaleik tímabilsins. Þrátt fyrir misjafnt gengi Liverpool á leiktíðinni var Patrik fastur maður í liðinu. Hann barðist eins og ljón, lék af miklum krafti og skoraði níu mörk. Að auki var hann búinn að bæta þann hluta leiks sína sem sneri að því að verjast andstæðingum sínum. Berger var kominn til að vera.