)

Jose Reina

Lesendur Liverpool.is hafa kveðið upp dóm sinn. Samkvæmt áliti þeirra þá er Jose Reina Maður ársins 2010 hjá Liverpool. Þetta þýðir að Spánverjinn hefur verið valinn Maður ársins tvö ár í röð og endurtekur afrek Steven Gerrard frá 2006 og 2007.

Flestir þeir sem fjalla um málefni Liverpool voru sammála um það að Jose Reina hefði verið besti leikmaður Liverpool á síðasta keppnistímabili og það kemur því ekki á óvart að lesendur Liverpool.is hafi valið hann þann mann sem skaraði fram úr á síðasta ári. Það var ekki yfir miklu að gleðjast á árinu 2010. Liðið stóð ekki undir væntingum, Rafael Benítez yfirgaf félagið og það gekk ekkert betur eftir að Roy Hodgson tók við. 

Helsta gleðiefnið var að Liverpool Football Club var selt. Reyndar vakti það líka mikla ánægju þegar var tilkynnt undir vorið að Jose Reina hefði gert nýjan sex ára samning við Liverpool. Þessi ákvörðun Jose Reina þótti merkileg í því samhengi að á sama tíma töldu margir að Rafael Benítez væri búinn að missa öll tök á sterkustu leikmönnum sínum. Ekki benti nú þessi ákvörðun til þess. Jose Reina vildi sem sagt frekar vera áfram hjá Liverpool en að fara til einhvers annars félags og víst er að mörg höfðu og hafa hug á að fá hann í sínar raðir. ,,Ég er í skýjunum með að hafa skrifað undir nýjan samning. Að ég verði hérna næstu sex árin eru líklega bestu fréttir lífs míns. Ég og fjölskylda mín erum mjög ánægð hér. Að spila fyrir Liverpool er einstakt, ég hef verið hérna í fimm ár og nú verð ég í önnur sex í viðbót og það er afar spennandi." Fyrir utan þennan nýja samning gladdi Jose stuðningsmenn Liverpool oft með góðum markvörslum.

Jose Reina var í heimsmeistaraliði Spánverja í Suður Afríku á liðnu sumri þó hann kæmi ekki við sögu í neinum leik. Það var þó vitað að hann lék lykilhlutverk í hópnum enda með afbrigðum góður liðsmaður og hann er líka lykilmaður í liði Liverpool innan vallar sem utan. Hann er sannur leiðtogi og leiðtogahæfileikar hans hafa oft komið í ljós. Roy Hodgson kunni vel að meta þessa hæfileika hans og skipaði hann fyrirliða í nokkrum leikjum þegar þeir Steven Gerrard og Jamie Carragher voru meiddir. 

Jose hóf þetta keppnistímabil vel og sérstaklega þóttu tvær markvörslur hans gegn Birmingham á St Andrews magnaðar. Í bæði skiptin varði hann skalla á ótrúlegan hátt og Liverpool slapp með markalaust jafntefli. Reyndar hefur Jose fengið á sig mun fleiri mörk en hann er vanur en varnarleikur Liverpool var ekki jafn góður og síðustu árin á fyrri hluta keppnistímabilsins og það hafði sitt að segja fyrir markmanninn. Samt sem áður setti hann nýtt félagsmet í desember þegar hann hélt marki Liverpool hreinu í 100. sinn í sínum 198. leik. Ray Clemence átti gamla metið sem var 217 leikir. 

Slæmt gengi Liverpool framan af leiktíð og til loka ársins olli því að fjölmiðlamenn komu hvað eftir annað fram með getgátur um að Jose Reina vildi fara frá Liverpool og voru mörg stórlið orðuð við hann. Það eru svo sem ekki nein vísindi að mörg stólið á Englandi og víðar myndu vilja hafa Jose í sínum röðum. Jose hefur af og til ítrekað að hann hafi ekki hug á að yfirgefa Liverpool. Þetta sagði hann undir lok ársins. ,,Ég nenni ekki að tala um önnur lið og áhuga þeirra. Það eina sem ég vil tala um er Liverpool. Ég vil vinna titla með Liverpool og jafnvel þótt við séum að berjast fyrir öðru núna í augnablikinu þá veit ég hvað í liðinu býr og ég vonast til þess að við komumst aftur á flug innan skamms."

Í nútímaknattspyrnu er aldrei á vísan að róa í því hversu mikil hollusta leikmanna er en við vonum að Jose Reina verði sem lengst hjá Liverpool. Ástæðan er einföld. Jose Reina er einn besti markmaður heims! 


Hér eru niðurstöður í kjöri á Manni ársins.

Jose Reina 49%

John W Henry 16%
 
Martin Broughton 14%
 
Steven Gerrard 11%
 
Einhver annar en þeir sem hér eru fyrrnefndir 6%

Fernando Torres 4%

Heildarfjöldi greiddra atkvæða í kjörinu var: 1110.

Maður ársins hjá Liverpool.is 2009
- Jose Reina

Maður ársins hjá Liverpool.is 2008 - Fernando Torres.

Maður ársins hjá Liverpool.is árið 2007 - Steven Gerrard. 

Maður ársins hjá Liverpool.is árið 2006 - Steven Gerrard.

Maður ársins hjá Liverpool.is árið 2005 - Rafael Benítez.

Sf. Gutt.


TIL BAKA