Steven Gerrard

Fréttaritarar liverpool.is voru á leik Liverpool og Everton ásamt öðrum 125 Íslendingum og það er einróma álit allra að Steven Gerrard var maður leiksins. Það er ekki vafamál að Steven hefur eignast fullt af íslenskum aðdáendum í þessum leik vegna þess að við höfðum mjög gott sjónarhorn á hvernig hann lék kantmann Everton grátt hvað eftir annað. Tæklingarnar hans voru rúmlega fullorðinstæklingar og aldrei nokkurn tíma braut hann á leikmanninum. Steven rúllaði reyndar stundum út að auglýsingaskilti enda erfitt fyrir hann að stöðva sig á þessari rosalegu ferð.

Sander var ekki sleipur í hornspyrnunum frekar en fyrri daginn en Steven taldi það ekki heldur eftir sér að redda því með beinskeyttum sköllum frá marki. Það var því ekki nóg með að Steven réði hægri kantinum heldur stjórnaði hann vítateignum einnig.

Gerrard var sigurreifur eftir leik: "Sigurleikir gegn Everton eru alltaf sérstakir. Það var frábært fyrir Nick Barmby að skora gegn fyrrverandi félagi sínu. Það hlýtur að hafa verið draumi líkast fyrir hann að sjá boltann fara í netið. Ég get fullvissað ykkur um að ég var líka í draumaheimi. Ég naut hverrar einustu mínútu. Það er gaman þegar fólk segir að þú hafir verið að leika vel. Ég hef ekki leikið marga leiki í hægri bakverðinum en ef ég held áfram að standa mig svona vel og held sæti mínu í liðinu þá er það hið besta mál."

Houllier var ánægður með strákinn: "Það er erfitt að velja sérstakan leikmann úr liðinu eftir svona góða frammistöðu en Steven var frábær."