Steven er tilbúinn að skrifa undir nýjan samning

Steven Gerrard segist hvenær sem er tilbúinn að skrifa undir nýjan samning við Liverpool. Fyrirliðinn gerði nýjan samning við Liverpool sumarið 2005 og það eru enn tvö ár eftir af þeim samningi. Hann vill nú semja til lengri tíma. Talið er að nýr samningur verði til fjögurra ára.  Það verður vonandi gengið frá þessum samningi sem allra fyrst. Það yrði ekki auðvelt að finna mann sem gæti leyst Steven Gerrard af hólmi.

"Það eru viðræður í gangi og ég er hvenær sem er tilbúinn að skrifa undir nýjan samning. Það styttist í að það verði gengið frá samningnum. Ég er ekki viss hvenær það verður gert en ég er tilbúinn að skrifa undir. Um leið og samningurinn liggur fyrir mun ég skrifa undir. Ég er að verða 27 ára og vonandi get ég skrifað undir langtímasamning sem myndi tryggja að ég myndi eyða bestu árum ferils míns hjá þessu knattspyrnufélagi."