Munum ná titlinum!

Steven Gerrard var daufur í dálkinn eftir síðasta leik leiktíðarinnar en hann horfir þó með bjartsýni til næstu ára. Hann hefur trú á að Liverpool verði Englandsmeistari á allra næstu árum og hann trúir því að hann verði enn að spila þegar kemur að titlinum langþráða.
 
,,Það er erfitt að sætta sig við að vera svona nærri þessu en ná svo ekki að vinna á lokasprettinum. En á hinn bóginn þá er ég geysilega stoltur af strákunum og því að við náðum markmiði okkar fyrir mörgum vikum. Þetta er þó ekkert svartnætti því við erum komnir í Meistaradeildina."

,,Það er ekki fyrr en núna að ég er orðinn 33. ára að ég hef upplifað almennilega baráttu um titilinn. Þessi reynsla á eftir að skila þessu unga liði titlinum hvort sem það verður næsta ár eða árið þar á eftir. Mín trú er sú að það sé farið að styttast í þetta því það eru miklir hæfileikar í liðshópnum."

,,Ég hélt satt að segja að ég ætti ekki eftir að berjast oftar um titilinn. En eftir að hafa spilað með þessum strákum þá átta ég mig á því að draumurinn hefur kviknað á nýjan leik. Þó svo að ég eigi ekki nema nokkur ár eftir þá hef ég ennþá þá trú að ég geti náð titlinum. Ég gefst aldrei upp í neinni baráttu. Ég hélt að ég ætti ekki eftir að geta haldið því fram með sannfæringu að það sé orðið stutt í titilinn."

Það munaði sáralitlu að Liverpool næði Englandsmeistaratitlinum en við vonum að Steven Gerrard hafi rétt fyrir sér og hann skili sér í hús á Anfield á allra næstu árum. Það er kominn tími til og það fyrir löngu!

Hér má horfa á viðtöl, sem voru tekin eftir leikinn við Newcastle, við Steven Gerrard, Brendan Rodgers og fleiri úr röðum Liverpool.