Daniel Ayala seldur til Norwich

Varnarmaðurinn Daniel Ayala var í dag seldur til Norwich City. Ekki kom fram hvað Liverpool fékk í sinn hlut fyrir Spánverjann en ljóst er að hann var seldur á hærri upphæð en greidd var fyrir hann á sínum tíma.  

Mikið gerðist á einni viku í málum Daniel Ayala því síðasta laugardag var tilkynnt að Liverpool og Hull City hefðu náð samningum um vistaskipti hans. Næst gerðist það að Swansea City bauð í Daniel og svo kom Norwich til sögunnar. Daniel gekk svo til liðs við Kanarífuglana í dag. 

Liverpool keypti Daniel Ayala frá Sevilla árið 2007 fyrir 160.000 sterlingspund. Hann hefur þótt með efnilegri leikmönnum Liverpool síðustu árin. Daniel lék fimm leiki með aðalliði Liverpool. Á síðasta keppnistímabili var hann lánaður til Hull City og Derby County og þótti standa sig vel.

Við óskum Daniel Ayala góðs gengis hjá nýja liðinu sínu.