Gerrard: Ég líð fyrir fjölhæfni

Steven Gerrard segir að leikur hans hafi liðið fyrir fjölhæfni sína. Hann hafi of oft verið settur á kantinn af því enginn annar gat spilað þar. Þetta á sérstaklega við um enska landsliðið, en þar hefur hann ótrúlega sjaldan spilað í sinni bestu stöðu, á miðri miðjunni.

"Ég hef liðið fyrir það að geta leikið vel í öðrum stöðum. Aðrir leikmenn flakka ekki svona mikið á milli því að þeir geta það hreinlega ekki. Ég get ekki spilað á vinstri eða hægri kantinum og verið eins og Kaka eða Robinho, ég bara mæti á staðinn, gef allt mitt í leikinn og á þokkalegan leik. Ég mun leggja hart að mér, vinna mína varnarvinnu og hjálpa liðinu. Þess vegna gera stjórar þetta, en það hefur áhrif á mig.

Leikur minn líður fyrir það að ég sé að skipta um stöðu á vellinum. Ég er miðjumaður og í stórum leikjum vil ég spila á miðjunni og sýna að ég er einn þeirra bestu í þeirri stöðu.

Ég hef spilað í minni bestu stöðu með enska landsliðinu í fimm leikjum af 68. Hvað get ég gert? Ég fer á æfingar með enska landsliðinu og reyni að sanna mig á hverjum degi. Allir þeir sem hafa þjálfað enska landsliðið vita hvar ég vil spila, en þeir ákveða liðsuppstillinguna og ég leik þar sem mér er sagt að leika."