Bellamy gerður að fyrirliða Wales

Craig Bellamy hefur verið útnefndur fyrirliði landsliðs Wales eftir að Ryan Giggs lagði landsliðsskóna á hilluna í gær.

Giggs mun spila sinn síðasta leik fyrir Wales gegn Tékklandi á laugardaginn kemur en eftir það mun Bellamy bera fyrirliðabandið.

John Toshack, þjálfari velska landsliðsins sagði:  ,,Craig er mikill karakter en ég hef fulla trú á honum sem nýjum fyrirliða Wales það sem eftir er af hans landsliðsferli."

Bellamy var fyrirliði landsliðsins í október í fyrra í tveim leikjum gegn Slóvakíu og Kýpur þegar Giggs var meiddur.

Toshack bætti við:  ,,Ég tók Bellamy fljótlega afsíðis og sagði honum að hann myndi taka við fyrirliðastöðunni þegar Giggs myndi hætta.  Án nokkurs vafa er hann rétti maðurinn í starfið.  Hann stóð sig mjög vel sem fyrirliði í þessum tveim leikjum í október.  Hann er mikill Walesverji í sér og hann er ekki hræddur við að láta í sér heyra inná vellinum."