Varaliðið vann

Varaliðið vann sinn fjórða sigur í síðustu fimm leikjum þegar liðið vann góðan útisigur á Sheffield United í gærkvöldi. Þessi góða rispa varaliðsins að undanförnu hefur lyft liðinu upp í fimmta sæti deildarinnar. Fram eftir allri leiktíð var liðið í neðri hluta deildarinnar þannig að þróunin upp á síðkastið er mjög gleðileg. Liverpool er komið í fimmta sæti varaliðsdeildarinnar með sigrinum.

Gary Ablett stillti upp óreyndu liði eins og svo oft á þessari leiktíð. Af þeim leikmönnum sem hófu leikinn hafði aðeins Nabil El Zhar spilað með aðalliðinu. Li Tie, sem var eitt sinn hjá Everton, gat komið Sheffield United yfir á 10. mínútu þegar Padelli sló boltann af veikum mætti út í teiginn eftir fyrirgjöf en Tie skaut beint í Flynn á marklínunni. Jack Hobbs kom Liverpool yfir á 21. mínútu eftir að skot Jays Spearing missti marks. Jack rak fótinn í boltann og stýrði honum neðst í markhornið. Nabil El Zhar hefði átt að bæta öðru marki við í upphafi síðari hálfleiks eftir að hann hafði brotist í gegnum vörn United og var einn gegn Paul Gerrard í markinu. Hinn reyndi Paul, sem eins og Li Tie var hjá Everton, sá hins vegar við honum. Varamaðurinn Jamaíkabúinn Reneil Sappleton, sem er á reynslu hjá félaginu, tryggði 2:0 sigur á lokamínútu leiksins. Hann tók við sendingu, lék á varnarmann og skaut þrumuskoti framhjá Paul í markinu sem var bjargarlaus.

Liverpool: Padelli, Darby, Insua, Huth, Hobbs, Spearing, Anderson, Flynn, Lindfield (Sappleton 80.mín.), El Zhar og Threlfall (Brouwer 70. mín.).

Maður leiksins samkvæmt Liverpoolfc.tv: Jack Hobbs.

Ýmsir reiknuðu með því að Harry Kewell myndi taka þátt í þessum leik. Hann hefur verið að æfa að undanförnu og staðarblaðið Daily Post gerði því skóna í gær að Harry myndi spila með í þessum leik. Svo varð þó ekki raunin.