Góðar meiðslafréttir!

Það bárust góðar meiðslafréttir úr herbúðum Liverpool í dag. Fjórir leikmenn sem hafa verið mislengi frá gátu hafið æfingar. Vonandi verða þeir sem fyrst leikfærir og tilbúnir í slaginn.

Um er að ræða þá Alisson Becker, Trent Alexander-Arnold, Diogo Jota og Stefan Bajcetic. Þrír þeir sem fyrstir eru nefndir eru búnir að vera meiddir síðustu vikurnar og það hefur munað um þá þó liðinu hafi gengið mjög vel.


Stefan er á hinn bóginn búinn að vera meiddur í um það bil eitt ár. Hann hefur þó komið við sögu í tveimur leikjum á leiktíðinni en það var í haust. Hann lofaði sérlega góðu á síðasta keppnistímabili þegar hann spilaði 19 leiki.

Nú er að vona að bati þeirra félaga hafi verið góður og engin bakslög verði nú þegar þeir koma aftur til leiks. Það munar um alla á lokasprettinum!