| Sf. Gutt

Jürgen Klopp á gosstöðvunum!


Jürgen Klopp er ekkert öðruvísi en margir aðrir þessa dagana. Hann veit vel af eldgosinu sögulega á Reykjanesskaganum enda búið að fjalla um það í fjölmiðlum um allan heim frá því það hófst föstudaginn 19. mars. Hermt er að hann hafi hug á að skoða gosstöðvarnar í Geldingadölum í dag skírdag!

Liverpool á fyrsta leik eftir landsleikjahlé á laugardaginn þegar liðið mætir Arsenal í London. Leikmenn eru að safnast heim til Liverpool eftir landsleikina og því ekki alveg æfingafært fyrir allan aðalliðshópinn.


Auðvitað verður æft í dag en Pepijn Lijnders, mun stjórna þeirri æfingu. Samkvæmt fréttum úr innsta hring ætlar Jürgen Klopp að taka sér frí í dag skírdag, skjótast til Íslands og leigja sér þyrlu til að fljúga að gosstöðvunum. 

Leiguþyrlan er rauð, að beiðni Jürgen, en ekki merkt Liverpool! Hún ætti að lenda á svæðinu um klukkan fimm nú síðdegis. Þar sem þyrlan er rauð ætti ekkert að fara á milli mála fyrir aðdáendur Liverpool sem verða á svæðinu!



Jürgen fer svo strax heim til Liverpool í kvöld þar sem undirbúningur fyrir leikinn við Arsenal hefst fyrir alvöru. Hann kemst strax til baka og sleppur við sóttkví enda búið að bólusetja marga á Englandi síðustu vikur. Síðustu fréttir um að Ísland sé ekki lengur grænt breyta engu um að menn geta framvísað staðfestingu á bólusetningu. Jürgen þarf jú að vera mættur snemma á nýja æfingasvæðið í Kirkby í fyrramálið enda þá bara rúmur sólarhringur í leikinn við Arsenal. 


Mikið hefur mætt á framkvæmdastjóra Liverpool það sem af árinu enda gengi liðsins verið hroðalegt. Margir leikir eru framundan og því er dagurinn í dag síðasti möguleiki fyrir Jürgen að lyfta sér upp í bili. Gosinu gæti vel verið lokið þegar keppnistímabilinu lýkur á Englandi í vor! 

Jürgen Klopp hefur eins og margir aðrir Þjóðverjar mikinn áhuga á Íslandi. Hann sótti landið heim 2017. Hann lét vel af þeirri heimsókn eins og margir muna eftir!


TIL BAKA
Nýlegar fréttir
Fleiri fréttir
Fréttageymslan