Fleiri Frakkar undir smásjánni

Talsmaður Auxerre hefur staðfest að Houllier var á leik Auxerre og Metz um helgina. Allir vita um áhuga Liverpool á hinum bráðefnilega framherja Djibril Cisse en talið er að Houllier hafi einnig auga með samherjum hans, miðvörðunum Phillipe Mexes (fæddur 30. mars 1982) og Jean-Alain Boumsong (fæddur 14. desember 1979). Mexes hefur löngum verið bendlaður við Man Utd en áhugi Liverpool á Boumsong er ekki nýr af nálinni. Hann var orðaður sterklega við Liverpool fyrir tveimur árum síðan en einhverra hluta vegna rættist ekki úr því og hann fór frá Le Havre til Auxerre.

Boumsong segist vera reiðubúinn að flytja sig um set í sumar ef því er að skipta: "Gerard Houllier var upp í stúku á laugardaginn og var örugglega að fylgjast með Cisse og öðrum leikmönnum. Ég mun sjá til í lok tímabilsins hvað næsta skref verður. Ég lít á þau tilboð sem liggja fyrir og ef eitthvað freistandi býðst þá vona ég að Auxerre leyfi mér að fara."

Cisse hefur áður lýst yfir áhuga sínum á að leika fyrir Liverpool þó að hann segist ekki reiðubúinn að yfirgefa Auxerre fyrr en eftir tvö ár. Það er enn talið að leið Mexes muni liggja fyrr eða síðar í herbúðir Manchester United.